МОНГОЛ БҮСГҮЙ ОСКАРЫН ШАГНАЛ ХҮРТЛЭЭ…

Б. Хажидсүрэн 2018-10-15 11:22 461

Найруулагч Б.Март “Нүүдлийн эмч” баримтат киногоороо Оскарын Оюутны академийн “Олон улсын баримтат кино” төрөлд ялалт байгууллаа. Энэхүү үйл явдлыг олон улсын хэвлэл мэдээллийн хэрэгслүүд “Хертфордширийн их сургуулийн төгсөгч ялалт байгууллаа” гэж онцолсон байв. Б.Март нь Их Британийн Хертфордширийн их сургуулийг кино, телевизийн урлагийн мастераар төгсчээ.
Америкийн кино урлаг болон шинжлэх ухааны академиас тодруулдаг 45 дахь удаагийн “Оскарын Оюутны академийн шагнал гардуулах ёслол” /2018.10.12/ болсон юм.

Монгол бүсгүйд “Оскар” авчирсан “Нүүдлийн эмч” баримтат кинонд жилийн дөрвөн улиралд өдөр шөнийг үл харгалзан 10-100 км зам туулан иргэддээ үйлчилдэг Дундговь аймгийн Өндөр шил сумын өрхийн эмчийн тухай өгүүлнэ. Машин, морь, тэмээ унан, сумынхаа иргэдэд эрүүл мэндийн тусламж үйлчилгээ үзүүлдэг.
Оскарын Оюутны академийн шагналд өрсөлдсөн 1582 бүтээлээс шалгарсан”Нүүдлийн эмч” кино нь Америкийн кино академийн дээд шагнал болох “Оскар”-т өрсөлдөх эрхтэй болж байгаа юм. Найруулагч Б.Март шагналаа гардаж аваад

 

“Бүтээлийнхээ санааг олох амаргүй байсан. Толгойд маш олон санаа эргэлдэж байлаа. Улсынхаа соёл, зан заншлыг дэлхийд таниулахыг үргэлж хүсдэг байсан. Миний эгч эмч. Эгч маань эмч нар хол замыг хэрхэн туулж, өвчтөндөө үйлчилгээ үзүүлдэг тухай ярьсан. Үүнээс нь санаа авч “Нүүдлийн эмч” баримтат кино төрсөн” гэжээ.

эх сурвалж:zindaa.mn

error: Content is protected !!